وجهت الفنانة رسالة شكر لجمهورها على دعمهم لها بعد فقدان جدتها نوال، حيث نشرت مقطع فيديو عبر حسابها الرسمي على فيسبوك، وعلقت قائلة: “شكرًا على كل كلمة ودعوة .. شكرًا من قلبي”.
شوف كمان: مهرجان القاهرة السينمائي يطلق منصة القاهرة للأفلام بالتعاون مع Cine Vibe
وئام مجدي توجه رسالة شكر لجمهورها
تحدثت الفنانة وئام مجدي في هذا الفيديو، حيث قالت: “طالعة أقولكم قد إيه أنا شوفت حب لتيتا .. شوفت أدعية .. وقد إيه شوفت ناس بتبعتلي فويس نوتس بتعيط .. الناس اللي بتبعتلي أنا كوئام ربنا يصبرك .. كل ده فرق معايا وخلاني أكون أحسن .. غصب عني مش متقبلة أوي كده .. بس أكيد أرريح من أنها كانت تعبانة آخر 6 شهور .. لما حد كان بيسألني عليها في الشارع كنت بتعب جدًا .. مكنش عندي حاجة أعملها .. أنا أحسن كتير وأقوى كتير مما كنت فاكرة .. وأنتوا ساعدتوني على ده .. بنزل شغلي وبصور .. الحياة هتمشي .. هبقى كويسة .. زي لما هي كانت معايا ولما كنت بكتئب أو أضايق .. كانت عايزاني أكون كويسة .. كانت شخص يحببني في الحياة .. زي ما أنتوا شوفتوا حبها للحياة .. أنا طالعة بحب الحياة .. عارفة أن الدنيا هتمشي .. أكيد في حاجة جوايا اتغيرت مش هترجع تاني .. اللي بيمشوا بياخدوا حتة مننا زي بابا وزي تيتا .. أنا متقبلة أنها تكون في حتة أحسن من الوجع اللي كانت فيه”.
وئام مجدي تلوم بعض متابعيها
وجهت الفنانة وئام مجدي رسالة لوم لبعض المتابعين، حيث قالت: “أنا لما بنزل صور أو كده .. بتكون في تعليقات بتقول أه ما خلاص هي نسيتها .. زي ما شوفت تعليقات ورسايل الناس بجد شوفت حنية رهيبة وحاسين بيا .. بس برضو شوفت ناس جاحدة .. زي مثلاً ناس تبعتلي رسايل ولما مردش يقولولي أنت هتتنكي أحنا متابعينك عشان تيتا .. أنا بيتبعتلي كتير مش هقدر أرد على كل حد .. وكمان لازم الناس تقدر .. شكرًا بس مش لدرجة يتقال لي كده .. أو أنزل حاجات للفيلم لأن ده شغلي ودي اتفاقات وعقود .. مش معنى أني بنزل أني نسيت .. أنا مش مضطرة أبرر”.
وئام مجدي: “بهتم بالإنسانيات”
واستكملت الفنانة وئام مجدي حديثها قائلة: “مبسوطة من حبكم لتيتا وليا .. شوفت تعليقات سلبية كتير وبشعة بس أنا مش بهتم بيها لأني بشوف أن الإنسانيات أهم حاجة .. شوفت ناس بجد عايزاني أكون كويسة وأرجع وأشتغل وأكبر زي ما تيتا كانت عايزة .. زعلانة أوي أكيد .. بس معنديش حاجة أعملها غير أني أقبل .. حابة أقولكم أني بدعي بس أنا مبعرفش لسه أقول ربنا يرحمها لأني لسه مش مستوعبة .. ولكن في الفيديو ده هقول ربنا يرحمها عشان كل واحد يشوفها يقول ربنا يرحمها .. هفضل أفكركم بيها دايمًا .. هي مش فترة وهتعدي .. هي رزق كبير جدًا في حياتي .. هي اللي خلتني أكون نفسيًا أحسن .. يارب أرجع تاني كويسة ومبسوطة .. وأعمل حاجات كتير هي كانت عايزاني أعملها .. ربنا يرحمها يارب”.
مقال له علاقة: أمير كرارة يعود لموسم دراما رمضان 2026 بعد غيابه في 2025