إسلام فوزي يدافع عن محمد عبد العاطي ويؤكد أنه مثقف ومتعلم ولا يمكن مقارنته بالذين تم القبض عليهم

دافع اليوتيوبر والفنان عن صانع المحتوى محمد عبد العاطي بعد القبض عليه مؤخرًا بسبب اتهامات تتعلق باستخدام ألفاظ خادشة للحياء ومخالفة الآداب العامة، مؤكدًا أن محمد قد أخطأ، ولكن لا يجوز مقارنته بالبلوجرز والتيك توكرز الآخرين الذين تم القبض عليهم، خاصة أنه شخص مثقف ومتعلم.

كلامه حلو ومترتب ومثقف ومتعلم ومحتواه حلو

وقال إسلام فوزي في فيديو عبر صفحته الرسمية بموقع فيسبوك: “الفيديو ده ترددت قبل ما أعمله.. لما كنت بشوف فيديوهات محمد عبد العاطي بلاقي أن كلامه حلو ومترتب ومثقف ومتعلم ومحتواه حلو أوي، لكن كان عندي اعتراض على الشتيمة، وبشوف أن مالهاش لازمة، ومحتواه ينفع من غير شتيمة وهيكون ممتع ومضحك وظريف، لأن الشتيمة مش هتعرف تتحكم فيها على السوشيال ميديا حتى لو كتبت 18 بلس، لأن كل الناس هيوصلها اللي بتقوله، ولو عاوز تعمل محتوى بالشكل ده اعمل استاند أب كوميدي لأن اللي رايحلك عارف وفاهم هيسمع إيه”

مينفعش أساوي محمد عبد العاطي بباقي الناس اللي اتمسكوا

وأضاف إسلام فوزي: “أنا بعمل الفيديو ده علشان فيه وجهة نظر عاوز أعرضها، مينفعش أساوي محمد عبد العاطي بباقي الناس اللي اتمسكوا، بدأنا القصة بتجارة أعضاء وغسيل أموال ومن ثم المحتوى الخادش، عارف أن اللي عمله غلط، لكن مينفعش الرؤوس كلها تتساوى، فيه جرائم بشعة وكبيرة تستحق الضجة، رغم أن ما قام به خاطئ، لكنه لا يساوي التشهير والحملة اللي معمولة ضده”

وتابع إسلام فوزي: “أنا معرفش محمد شخصيًا، لكن أنا شايف أنه بروفايل ومثقف ومن طبقة اجتماعية متوسطة أو فوق المتوسطة ومتعلم، اللي جواه وصل لناس كتير، وشخص كويس وكلنا عندنا أخطاء، عارف أن الشتيمة مش حاجة قليلة، لكن خليك واقعي لأن ده بيحصل في كل مكان، ومعاكم أنه مينفعش يكون محتوى عام، ولكن مش زي إني اتاجر في الأعضاء أو بغسل أموال”

واستكمل: “فيه جزئية كمان تحسب لمحمد عبد العاطي، أنه كان بيداري على الشتيمة، فيه غيره مش بيداري على الشتيمة، هما برضه اتمسكوا، وبرضه هما مش شبهوا في الفكر ومستوى التعلم والثقافة، في النهاية ربنا يهدينا جميعًا وكلنا بنغلط، وأتمنى أنها تكون حاجة بسيطة وتعدي”