محمود العزازي يوجه رسالة لتامر عبدالمنعم: يجب قول الحقيقة حول الظلم والشر

كشف الفنان محمود العزازي تفاصيل الخلاف الذي نشأ بينه وبين الفنان عبد المنعم، وذلك بسبب مسرحية “نوستالجيا ٨٠/٩٠” التي عُرضت مؤخرًا في الإسكندرية، حيث أعلن عبد المنعم أنه أنقذ العرض وقدّم الدور بدلًا من العزازي بسبب تغيبه المفاجئ.

وفي فيديو عبر حسابه على فيسبوك، تساءل العزازي: “ليه موضوع عادي وطبيعي بيحصل في كل العروض اللي في الدنيا، يتحول لأزمة وصحافة وبروباجندا، ونطلع تريند إحنا الاتنين ويحصل خصومة، اللي بيحصل فيه عدم احترام للناس، وبعيد عن الواقع وعن الحقيقة تمامًا، وده واضح من تعليقات الناس”

اللي بيتقال ظلم وشر كبير ما استاهلوش

وأكد العزازي أنه لم يتغيب عن العرض، بل اعتذر قبل فترة وتم قبول اعتذاره: “لم أتغيب في اللحظات الأخيرة، واللي بيتقال ظلم وشر كبير ما استاهلوش، بحكم المحبة والدوافع الإنسانية اللي كانت بتجمعنا كلنا من أكبر حد لأصغر حد، وأنا مضطر أدافع عن نفسي، لأني مش عاوز أكون جزء من اللي بيحصل ده، لأن الممثل سمعة، هذا الشاب اللي كان طفل بيحلم يمتهن هذه المهنة العظيمة، مستحيل أصلي مش حمار علشان أتغيب في اللحظات الأخيرة عن عرض ناجح أنا أحد أبطاله، والناس بيستنوني على البوابة قبل العرض وبعده، مكنتش معاكم في إسكندرية علشان أتغيب عن العرض، حمار مين اللي يسيب عرض هو نجح في هذا النجاح في اللحظات الأخيرة بدون سبب”

رمي كلام بالباطل

وأضاف محمود العزازي: “ثالثا اللي نقلوا الكلام ده على لسان تامر عبد المنعم يقولوا لينا تغيبت ليه، هو رمي كلام بالباطل وخلاص؟ ولا لازم يكون فيه سبب، إيه حصل علشان أتغيب وتامر ينقذ العرض بدالي، وتامر زكي كفاية أنه ما يقولش اسمي، وكتب بالظبط الممثل اللي المفروض يعمل دور عادل إمام، محتمل يكون بيتكلم عن الممثل البديل، ومحتمل يقصدني أنا، لكن اللي نقلوا كلامه ذكروني أنا.. وأنا مكنتش في إسكندرية وفي فيديو موثق، وبعد العرض الأخير اجتمعت مع المخرج المنفذ ومدير مكتب تامر يوم 13 يوليو واتفقت معاهم اني مش هقدر أكون متواجد خميس وجمعة لأني بمر بظرف عائلي قهري يمعني وقهري لأنه لولا أن الظرف صعب مكنتش تغيبت لأنه عرض مهم بالنسبة لي وقريب لي فكان لازم يكون فيه ظرف قهري يمنعني”

وتابع العزازي: “هما تفهموا اعتذاري ولكن بشرط قالوا لي لو اعتذرت مش هتطلع تاني علشان الممثل البديل هيطلع بدالك.. وافقت وأنا مضايق وحزين أن ده هيحصل وبعد 17 يوم، رجعولي وقالوا إن الممثل البديل جالوا شغل في السعودية وانقذنا ووعد أن 1 أغسطس هيكون آخر عرض.. وفي أوضة المكياج المخرج المنفذ قال لي إن ده آخر عرض ليك ووعد مني مش هنطلبك تاني.. وحضنا بعض وسلمنا على بعض بكل حب ومودة”

واستكمل: “بعد ما رجعنا المخرج المنفذ قال لي ده قرارك النهائي لأن تامر هيطلع مكانك الأسبوع الجاي، وعلاقتي بنوستالجيا حمدت ربنا أنها خلصت بهذا الحب، هي دي الحقيقة ولازم الصحافة يوصلوا الحقيقة لأن التصريح غير منطقي، فكرة أنه ترك العرض في اللحظات الأخيرة إزاي.. شخصية عادل إمام تلات لوحات، شمس الزناتي والحريف والواد سيد الشغال.. وملابس شخصية شمس الزناتي تحديدًا محتاج تتوفر مقاس الممثل بوقت كافي، لو أنا تغيببت كيف استطاع تامر أنه ينقذ العرض ويوفر اللبس على مقاسه قبل العرض بدقائق، أكيد كان فيه وقت”

واختتم العزازي حديثه برسالة لتامر عبد المنعم قائلًا: “كلامي لتامر بروح الواد والصداقة لو ما زال يبقى على هذه الصداقة، رأي كانت تتلعب بطريقة تانية أحلى وأشيك وإنك تقول الحقيقة وأنا عارف إنك تقصدني لأن مساعدينك بيكلموني بطريقة جافة، كان المفروض تقول محمود العزازي اللي التزم واجتهد اعتذر لأسباب خارجة عن إرادته ومكانش فيه فرصة نوجد بديل فقمت أنا بالعرض وأنقذته، ده أشيك ليا وليا وأشيك للعرض، وهنا بنشاور على أعظم شيء حصل في العرض وهو المحبة اللي كانت تجمعنا والود اللي كان بينا، والسبب اللي جعل الناس تحب العرض ده، لكن هنختار التريند ونبخس حق العرض والقائمين عليه، أنا ضد ده ويكفيني إنك ما قلتش اسمي.. وبطالبك تقول الحقيقة أنا استحق ده والعرض يستحق ده وأنت قبل مننا بقيمتك تستحق تقول الحقيقة”